هنا القاهرة

<
هنا القاهرة القاهرة القاهرة
هنا تاج بلدنا
هنا الألف مدنة ومدنة
قصادنا هنا
هنا سوق بلدنا
وزادنا قصدنا حصادنا هنا
هنا شوق ولادنا
همومنا عددنا
وأحلام تزيد عن عددنا هنا
هنا الضد بالضد
ده مستبد
ما تعرف مرارنا
هزار ولا جد
وده نهار عمل
ولا جمعة وحد
ولا حد خد باله
من أي حد
حياتنا هنا حارة سد
وسؤال ماله رد
لكن وردة الغد
فاردة على كل خد
هنا القاهرة القاهرة القاهرة
وأنا في قلب دوامتك الدايرة بينا
بأصرخ بحبك يا أجمل مدينة
يا ضحكة حزينة
يا طايشة ورزينة
بحبك وأعفر جبيني في ترابك
وأعيش في رحابك
وأقف جنب بابك
جنايني أروي بالدم وردة شبابك
يا زينة جنينة حياتنا اللعينة
بحبك بحبك بحبك
يا بنت اللذينة
شعر :سيد حجاب

لحن : عمار الشريعي

غناء :علي الحجار