Tuesday, July 11, 2006

سنة حلوة...يا عجوز


عمرك حسيت انك شايب وانت لسه ما كملتش تلاتين سنة؟ ربما يفاجئك السؤال كما يفاجئك انني أكتب للمرة الأولى على هذه المدونة بالعامية المصرية ، ربما لأن هذه المداخلة شخصية وخاصة للغاية لكن صدقني هذا هو ما شعرت به حين احتفلت انا العبد الفقير لله بعيد ميلادي الرابع والعشرين ، ياااااااااااااه بالسرعة السنين بتعدي كأنها أيام ؟ اليوم ورسميا أصبحت راجل عجوز وابتدا الشيب يخط في رأسي وبدأت اردد مع ناظم الغزالي "عيرتني بالشيب والشيب وقار ويا ليتها عيرتني بالذي هو عار "الاحتفال كان على الضيق والضيق أوي كمان ، يعني مقتصر على افراد أسرتي الحبيبة والدي ووالدتي وأخواتي الثلاثة ,وكان أجمل ما فيه السنة دي هو انى اتصالخت مع والدتي بعد فترة خصام مش ولا بد اضافة الى ان كل اخواتي هادوني بهدايا جميلة، هتقولي لحد هنا وكويس الاحباط جه منين بقى ؟ هقولك ان جه لأن مفيش حد من اصدقائي المحدودين والقليلين جدا واللي يتعدوا على صوابع الايد رضي ييجي وكله يا اما مشغول يا اما مسافر اضف الى كده انك بتكمل 24 سنة ومفيش بنت واقفة جنبك تقولك كل سنة وانت طيب وتهمس في ودنك "بحبك"ولو عاوز الحق ، البنت دي عمرها ما كانت موجودة في حياة العبد لله :)عموما اهو الواحد احتفل مع أهله وخلاص والظاهر كده اني عجزت بدري :)

4 comments:

fatma said...

كل سنة و انت طيب يا عمرو ....
حلوة فكرة التدوينة ، عيد الميلاد دايما بيكون فرصة لاعادة الحسابات ، و تقييم لاحداث السنة الماضية و نظرة للمستقبل .
احمد ربنا يا عمرو ان عندك حد تحتفل معاه بعيد ميلادك :)

so7ab said...

يا عمرو اولا كل سنة وانت مليون طيب ومش كنت تقولى يا عم علشان تبقى ووشى فى وشك بس بجد دى اجمل تدوينة حسيتها عندك وكمان لانها بتعتك اوى فى زمن محدش قادر يتكلم عن نفسه ومستخبين ورا قضايا كبيرة اوى .اتكلم عن نفسك يا عمرو وخلينا نحسك

سنة حلوة يا ابو الشباب

حسام فخر said...

يا عمرو
أولاٌ كل سنة وانت طيب وعقبال ما نفرح بك
ثانباًما تقولش إنك عجوز. انت وأصحابك واخواتك اللي عجزتونا وخليتونا كركوبة،فعلا الزمن بيجري!!
ثالثا أنا سعيد جدا بالمدونة بتاعتك واحساسها الوطني العميق. استمر وربنا يوفقك.
أخيرا أشكرك على زيارة مدونتي وأنا مبسوط إننا حنبقى على إتصال ببعض. تحياتي للأسرة كلها وآمل أن نلتقي على خير في زيارتي المقبلة لمصر بمشيئة الله.
عمك حسام

bdfytoday said...

I love your website. It has a lot of great pictures and is very informative.
»